بالی وڈ اداکارہ دیشا پٹانی کے گھر کے باہر نامعلوم حملہ آوروں کی اندھا دھند فائرنگ کی ویڈیو منظرعام پر آگئی۔
بھارتی میڈیا رپورٹس کے مطابق گزشتہ جمعہ کی شب 3:30 بجے کے قریب دیشا پٹانی کے بریلی میں واقع گھر پر فائرنگ کا واقعہ پیش آیا تھا، اس دوران 2 نامعلوم موٹر سائیکل سوار حملہ آوروں نے اداکارہ کے گھر پر اندھا دھند فائرنگ کی تھی۔
دیشا پٹانی کے گھر کے باہر ہونے والی فائرنگ کی سی سی ٹی وی اب منظر عام پر آگئی ہے۔
ویڈیو میں دیکھا جاسکتا ہے کہ موٹر سائیکل پر سوار 2 افراد اداکارہ کے گھر کے باہر آتے ہیں جس میں سے ایک شخص نے فائرنگ کی اور فائرنگ کے بعد ملزم فرار ہوگئے۔
سی سی ٹی وی کی یہ ویڈیو نہ صرف بھارتی میڈیا بلکہ سوشل میڈیا پر بھی کافی وائرل ہورہی ہے۔
واضح رہے کہ اداکارہ کے گھر پر حملے کی ذمہ داری بدنام زمانہ گینگسٹر روہت گودارا اور گولڈی برار گینگ نے بذریعہ سوشل میڈیا پوسٹ قبول کی تھی۔
بھارتی میڈیا رپورٹس میں بتایا گیا ہے کہ دیشا پٹانی کی بہن خوشبو پٹانی کی جانب سے گینگ کے روحانی رہنما ؤں پریمانند مہاراج اور انیرودھاچاریہ جی مہاراج سے متعلق توہین آمیز بیان دیا گیا تھا جس کی وجہ سے یہ حملہ کیا گیا۔
Leave a Reply