ہم سب ہی چمکتے گھنے بالوں والی ماڈلز کے اشتہارات دیکھتے ہیں جن کے بالوں کی چمک دمک آنکھوں کو چندھیا دیتی ہے اور وہ افراد جن کے بال صحت مند نہیں ہوتے وہ بھی اس کی خواہش کرنے لگتے ہیں۔
ہمارا مصروف ترین شیڈول ہمیں بالوں کی صحت کو برقرار رکھنے میں مدد نہیں دیتا۔
مگر خشک، روکھے اور بے جان نظر آنے والے بالوں کی چمک بحال کرنا زیادہ مشکل نہیں۔
ایسے متعدد گھریلو ٹوٹکے موجود ہیں جن کو اس مقصد کے لیے استعمال کیا جاسکتا ہے۔
ایک چمچ چینی
جی ہاں واقعی چینی صرف آپ کی چائے کو ہی میٹھا نہیں کرتی، یہ بالوں کی جگمگاہٹ بھی بحال کرسکتی ہے۔
ایک چمچ چینی کو شیمپو میں شامل کرنے سے بالوں کی اچھی صفائی اور چمک کا حصول ممکن ہوتا ہے۔
مگر ماہرین کے مطابق اس طریقے کو مہینے میں ایک سے 2 بار سے زیادہ آزمانے سے گریز کرنا چاہیے۔
کافی کو کنڈیشنر میں شامل کریں
اس طریقہ کار کو اس وقت مت آزمائیں اگر بالوں کو بلیچ کیا ہو یا آپ کے بال قدرتی طور پر سنہرے ہوں، البتہ اگر ہلکے بھورے یا گہرے رنگ کے بال ہیں تو کافی بالوں کی جڑوں کو نمی فراہم کرنے کے ساتھ ساتھ ان کی نشوونما بھی تیز کرنے میں مدد فراہم کرسکتی ہے۔
اس کے لیے ایک کپ سیاہ کافی بنائیں اور نہانے کے دوران ایک سے 2 کھانے کے چمچ کافی کو کنڈیشنر میں مکس کرکے سر دھولیں۔
سیب کا سرکہ بھی مددگار
اگر بال روکھے نظر آرہے ہیں تو سیب کے سرکے سے ان کی جگمگاہٹ بحال کی جاسکتی ہے۔
ہفتے میں ایک یا 2 بار معمول کے مطابق بالوں کو شیمپو اور کنڈیشنر سے دھونے کے بعد 50 فیصد سیب کے سرکے اور 50 فیصد پانی (جیسے 2 کھانے کے چمچ سیب کا سرکہ اور 2 چمچ پانی) مکس کریں اور بالوں پر انڈیل دیں۔
اس کے بعد چند منٹوں تک اسے لگا رہنے دیں اور پھر سر دھولیں۔
اسپرین
یہ صرف درد کش دوا نہیں بلکہ صحت مند اور چمکدار بالوں کے لیے بھی بہترین ہے۔
پہلے سر کو معمول کے مطابق شیمپو سے دھوئیں۔
پھر اسپرین کی 10 گولیاں ایک گرم پانی میں ملائیں اور پھر اس محلول کو سر لگا کر کچھ دیر انتظار کریں۔
اس کے بعد سر کو پھر پانی سے دھو لیں۔
شہد
چینی کی طرح شہد کو شیمپو میں شامل کرکے استعمال کرنے سے بھی بالوں کی جگمگاہٹ بحال ہوسکتی ہے۔
شہد کی چند بوندیں یا ایک چائے کا چمچ شہد ہتھیلی میں موجود شیمپو یا کنڈیشنر میں مکس کریں اس کے بعد سر پر لگائیں۔
کچھ دیر انتظار کرکے سر کو دھولیں۔
شہد سے بالوں کی چمک بحال ہونے کے علاوہ بالوں کی نمی بھی بحال ہوتی ہے جبکہ وہ زیادہ نرم ہو جاتے ہیں۔
چائے
روکھے بالوں کی چمک بحال کرنے کے لیے ایک چوتھائی کپ سیاہ چائے کو لیں۔
سر کو شیمپو سے دھونے کے کچھ دیر بعد چائے کے پانی سے دھو لیں۔
کچھ دیر انتظار کرکے ایک بار پھر سر کو پانی سے دھولیں۔
نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں۔
Leave a Reply