اسلام آباد: وزیراعظم کے مشیر رانا ثنا اللہ کا کہنا ہےکہ پاکستان تحریک انصاف (پی ٹی آئی) کو بار بار مذاکرات کا کہا مگر سینئر لیڈر شپ نے جواب دیا کہ انہیں بات کرنے کی اجازت نہیں ، بانی پی ٹی آئی بھی بانی متحدہ والے انجام کی طرف بڑھ رہے ہیں، بانی پی ٹی آئی سیاست نہیں محاذ آرائی کر رہے ہیں۔
جیو نیوز کے پروگرام کیپٹل ٹاک میں گفتگو کرتے ہوئے رانا ثنا کا کہنا تھا کہ وزیراعظم نے پارٹی کی اجازت سے پی ٹی آئی کو مذاکرات کی پیشکش کی، اگر یہ سمجھتے ہیں کہ ہمارے پاس طاقت ہی نہیں تو کیا ہم بغیرکسی انڈر اسٹینڈنگ کے بات کر رہے تھے۔
رانا ثنا کا کہنا تھا کہ پی ٹی آئی کو یہ بھی کہا کہ اسپیکر ہاؤس جائیں ہم وہاں بات کرنے آجاتے ہیں، ان کے سینئر لوگوں نے کہا کہ ہمیں بات کرنے کی اجازت نہیں، پی ٹی آئی کے ارکان نےکہا کہ ہماری بانی پی ٹی آئی سے ملاقات کرائیں، ارکان نے کہا کہ ملاقات کرائیں تاکہ ہم بانی پی ٹی آئی کو سمجھائیں۔
وزیراعظم کے مشیر رانا ثنا اللہ کا کہنا تھا کہ نواز شریف نے ہمیشہ اینٹی اسٹیبلشمنٹ سیاست کی ہے، لوگ اسٹیبلشمنٹ سے نفرت کرتے ہیں لیکن افواج پاکستان سے محبت کرتے ہیں، تحریک انصاف والے اس بات میں فرق نہیں رکھتے ، افواج کے خلاف بات کرتے ہیں۔
ان کا کہنا تھا کہ بھارتی میڈیا کو انٹرویوز اور گفتگو سے پی ٹی آئی کو نقصان پہنچا ہے، بانی پی ٹی آئی سیاست نہیں محاذ آرائی کر رہے ہیں اور افواج پاکستان کے خلاف کر رہے ہیں، بانی پی ٹی آئی بھی بانی متحدہ والے انجام کی طرف بڑھ رہے ہیں۔
پی ٹی آئی رہنما بیرسٹر علی ظفر نے رانا ثنا کی بات سے اتفاق کیا اور کہا کہ اب حکومت اور پی ٹی آئی میں ڈیڈ لاک ہے۔
بیرسٹر علی ظفر کا کہنا تھا کہ ہم نے کہا کہ کچھ ایسا ماحول دیں جس سے لگےکہ آپ کے پاس اختیار ہے، کہا کہ بانی پی ٹی آئی کی ہدایات کے بغیر مذاکرات کیسے ہوسکتے ہیں، بانی پی ٹی آئی کے بیان سے پہلے بھی مہینہ مہینہ ملاقاتیں بند ہوتی تھیں،بشریٰ بی بی نے تو سیاسی بات نہیں کی ان کی فیملی کو ملنے کیوں نہیں دیا جارہا؟
ان کا کہنا تھا کہ بانی پی ٹی آئی پر کس نے جھوٹے مقدمے بنائے؟ عدت سمیت ہر قسم کے کیس بنائے گئے تاکہ مقبولیت ختم ہو، کیسز بھی ختم ہوگئے لیکن بانی پی ٹی آئی کی مقبولیت ختم نہ کرسکے۔
Leave a Reply