پاکستان پیپلزپارٹی کے چیئرمین بلاول بھٹو زرداری نے کہا ہے کہ ایک پارلیمنٹ سے دو آئینی ترامیم کافی ہیں مزید کی گنجائش نہیں، مزید صوبے بنانے سے پہلے جہاں نئے صوبے بنانے پراتفاق رائےہے وہ بنائیں۔
لاہور میں سینیئرصحافیوں سے گفتگو میں بلاول کا کہنا تھاکہ مزیدصوبے بنانے سے پہلے پنجاب اسمبلی سےمنظورقراردادپرعمل کریں، سینیٹ کے کمیشن نے قرار دیا تھا کہ جنوبی پنجاب کو صوبہ بنایا جائے، پہلے جنوبی پنجاب کو صوبہ بنانے کیلئے اتفاق رائے کریں پھر آگے چلیں۔
انہوں نے کہا کہ پنجاب کی تقسیم کا سوچ بھی نہیں سکتا، پنجاب میں بلدیاتی نظام پرقانون بنایا، سندھ میں ایسا کرتا تو لوگوں نے الٹا ٹانگ دینا تھا، انھیں پنجاب میں میرا آناہضم نہیں ہوتا،میں توانھیں کہتا ہوں سندھ آیا کریں، میں یہ بھی کہتا ہوں کہ سندھ میں اپنا گورنر لگائیں جو ابھی تک نہیں لگایا۔
ان کا کہنا تھاکہ پنجاب میں اتحادیوں کو بھی اسپیس لینی پڑتی ہے، پنجاب میں وزارتیں نہیں لیں گے۔
بلاول بھٹو کا کہنا تھاکہ مزید صوبے بنانے سے پہلے جہاں نئے صوبے بنانے پراتفاق رائےہے وہ بنائیں، مفاہمت سیاست میں آگے بڑھنے کا بہترین طریقہ ہے، جھگڑے والے ماحول میں رہے تو معاملہ خراب رہے گا، ایک پارلیمنٹ سے دو آئینی ترامیم کافی ہیں، مزید کی گنجائش نہیں، آئین ایسی دستاویز نہیں کہ بار بار تبدیل کیا جائے۔
انہوں نے مزید کہا کہ بانی پی ٹی آئی سے ذاتی اختلاف نہیں، ان کا طریقہ غلط ہے جو صوبہ پی ٹی آئی کی ذمہ داری ہے وہاں ان کی حکومت ناکام ہوچکی۔
صحافی نے سوال کیا کہ نوازشریف سے کوٹ لکھپت ملنے گئے تھے کیا اڈیالہ بھی جائیں گے؟ انہوں نے جواب میں کہا کہ نوازشریف سے ملنے گیا تھا لیکن انہوں نے باہر نکلتے ہی ایک جلسے میں ہمارے پرحملہ کردیا، پیپلز پارٹی جب قدم بڑھانے کیلئے تیار ہوتی ہے تو پھر دوسری طرف حالات خراب ہوجاتے ہیں۔
موجودہ حالات میں وزیراعظم بنیں گے؟ صحافی کے سوال پربلاول نے کانوں کو ہاتھ لگالیے۔ پی پی چیئرمین نے کہا کہ پنجاب میں گورنر کےاختیارات اوروسائل نہیں رہے لیکن گورنرسلیم حیدر اچھا کام کررہے ہیں، وزیراعلیٰ پنجاب اچھا کام کررہی ہیں۔
Leave a Reply