ایپل کی جانب سے رواں سال کسی وقت پہلے فولڈ ایبل آئی فون کو متعارف کرائے جانے کا امکان ہے۔
اب ایک نئی لیک میں اس کا ڈیزائن اور دیگر تفصیلات سامنے آئی ہیں۔
میک ریومرز کی رپورٹ میں اس فولڈ ایبل فون کے بارے میں تفصیلات بتائی گئیں۔
رپورٹ میں بتایا گیا کہ اس فولڈ ایبل آئی فون کا کیمرا ڈیزائن مختلف ہوگا۔
یہ کیمرا ڈیزائن آئی فون ائیر سے ملتا جلتا ہوگا مگر وہ مکمل بلیک ہوگا اور وہاں 2 کیمرے ، ایک مائیکرو فون اور فلیش دیے جانے کا امکان ہے، تاکہ یہ فولڈ ایبل آئی فون دیکھنے میں آئی پیڈ پرو جیسا نظر آئے۔
رپورٹ میں مزید بتایا گیا کہ فولڈ ایبل آئی فون میں بٹنوں کو روایتی آئی فونز سے ہٹ کر نصب کیا جائے گا۔
ایپل کی جانب سے والیوم بٹن کو ڈیوائس کے اوپری دائیں کونے میں منتقل کیے جانے کا امکان ہے جیسا آئی پیڈ منی کا ڈیزائن ہے۔
اسی طرح ٹچ آئی ڈی کو پاور بٹن کا حصہ بنا دیا جائے گا جبکہ کیمرا کنٹرول بٹن دائیں کونے پر ہوگا۔
فون کے بائیں جانب کوئی بٹن نہیں ہوگا تاکہ فولڈ اور ان فولڈ شکل میں اس کا استعمال آسان ہوسکے۔
فولڈ ایبل آئی فون کے فرنٹ پر فرنٹ کیمرا چھوٹے ڈائنامک آئی لینڈ ڈیزائن میں دیے جانے کا امکان ہے جبکہ فیس آئی ڈی کو ڈیوائس کا حصہ نہیں بنایا جائے گا۔
اس طرح فولڈ ایبل آئی فون اس وقت دستیاب دیگر فولڈ ایبل اسمارٹ فونز سے مختلف ہوگا۔
اس سے ہٹ کر آئی فون فولڈ جب ان فولڈ کیا جائے گا تو وہ 7.8 انچ ڈسپلے سے لیس ہوگا جبکہ بند ہونے پر 5.5 اسکرین نظر آئے گی۔
فون کے اندر اے 20 پرو چپ دی جائے گی جبکہ 5500 ایم اے ایچ بیٹری دیے جانے کا امکان ہے۔
فولڈ ایبل آئی فون ستمبر 2026 میں آئی فون 18 پرو ماڈلز کے ساتھ متعارف کرایا جائے گا اور اس کی قیمت 2400 ڈالرز سے شروع ہوگی۔
ایپل کی جانب سے الگ سے ایک فلپ اسٹائل آئی فون کی تیاری پر بھی کام کرنے کی رپورٹس سامنے آئی ہیں۔
Leave a Reply