آسٹریلیا کے وزیراعظم انتھونی البانیز سڈنی حملے میں اپنی جان کی پروا کیے بغیر حملہ آور پر قابو پانے والے احمد ال احمد کا شکریہ ادا کرنے اسپتال پہنچ گئے۔
آسٹریلوی وزیراعظم نے اسپتال میں احمد کی عیادت کی اور ان کا شکریہ ادا کرنے کے ساتھ حال احوال دریافت کیا۔
انتھونی البانیز نے آسٹریلوی عوام کی طرف سے بھی احمد کا شکریہ ادا کیا۔
خیال رہے کہ 2 روز قبل سڈنی کے بونڈی بیچ پر2 مسلح افراد کی فائرنگ کے نتیجے میں 16 افراد ہلاک اور 40 کے قریب زخمی ہوگئے تھے۔
آسٹریلوی پولیس نے واقعے کو دہشت گردی قرار دیتے ہوئے بتایا کہ ہلاک ہونے والوں میں ایک فائرنگ کرنے والا بھی شامل ہے جب کہ دوسرے حملہ آور کوحراست میں لے لیا گیا ہے۔
آسٹریلوی میڈیا کے مطابق ایک حملہ آور کو وہاں موجود ایک شہری نے اپنی جان پر کھیل کر بہادری سے پکڑا اور اس کا اسلحہ چھین کر متعدد لوگوں کی جانیں بچائیں۔ اس بہادر شہری کی شناخت 43 سالہ احمد ال احمد کے نام سے ہوئی ہے جو کہ سڈنی میں دکان پر پھل فروخت کرتے ہیں اور 2 بچوں کے والد ہیں۔
رپورٹ کے مطابق حملہ آور پر قابو پانےکی کوشش میں خود احمد کو بھی بازو پر 4 سے 5 گولیاں لگیں، وہ اسپتال میں زیر علاج ہیں جہاں ان کی حالت خطرے سے باہر بتائی جارہی ہے۔
سوشل میڈیا پر بھی اس واقعے کی ویڈیوز تیزی سے وائرل ہو رہی ہیں جس میں احمد کو حملہ آور پر قابو پاتے دیکھا جاسکتا ہے۔ صارفین کی جانب سے احمد کی بہادری کی داد دی جارہی ہے اور آسٹریلوی میڈیا میں انہیں ہیرو قرار دیا جارہا ہے۔
امریکی صدر ٹرمپ نے بھی جان پرکھیل کر حملہ آورکو روکنے پر احمد کو بہادر قرار دیا اور کہا کہ یہ شخص قابل احترام ہے، اس بہادر شخص نے بہت سے لوگوں کی جان بچائی۔
Leave a Reply