2022 میں امیتابھ بچن کے ساتھ فلم ‘جھنڈ’ میں کام کرکے مشہور ہونے والے بھارتی اداکار پریانشو کو دوست نے قتل کر دیا۔
بھارتی خبر رساں ایجنسی کے مطابق پریانشو جو بابو روی سنگھ چھیتری کے نام سے بھی جانے جاتے تھے کو بدھ (8 اکتوبر) کی صبح ناگپور میں ان کےدوست نے شراب نوشی کے دوران ہونے والے جھگڑے کے بعد قتل کر دیا۔
اداکار کی عمر صرف 21 سال تھی جبکہ ملزم کی شناخت 20 سالہ دھرو لال بہادر کے نام سے ہوئی ہے جسے پولیس نے گرفتار کر لیا ہے۔
پولیس کے مطابق پریانشو اور دھرو اچھے دوست تھے اور اکثر ایک ساتھ شراب پیتے تھے۔
منگل کو رات گئےدونوں موٹر سائیکل پر جاری پٹکا علاقے میں واقع ایک ویران گھر میں شراب پینے گئے تھے۔ اسی رات دونوں میں جھگڑا ہوا، جس کے دوران پریانشو نے دھرو کو نقصان پہنچانے کی دھمکی دی اور بعد میں سو گیا۔
پولیس کے مطابق خوفزدہ دھرو نے پریانشو کو تاروں سے باندھ کر تیز دھار آلے سے حملہ کیا۔ پریانشو نیم برہنہ حالت میں زخمی پایا گیا، جس کے ہاتھ پاؤں پلاسٹک کی تاروں سے بندھے ہوئے تھے۔
بدھ کی صبح مقامی لوگوں کو طلاع ملی تو اسے مقامی اسپتال منتقل کیا گیا، جہاں ڈاکٹروں نے اسے مردہ قرار دیا۔
واضح رہے کہ پریانشو نے 2022 کی فلم جھنڈ میں ایک معاون کردار ادا کیا تھا۔ فلم میں امیتابھ بچن نے مرکزی کردار نبھایا تھا۔
Leave a Reply