چیزوں کو چپکانے کے لیے ٹیپ جیسے اسکاچ ٹیپ کا استعمال بہت زیادہ عام ہوتا ہے۔
مگر یہ صرف چیزوں کو چپکانے یا جوڑنے کے لیے ہی نہیں مددگار نہیں بلکہ اسے متعدد حیران کن کاموں کے لیے استعمال کیا جاسکتا ہے۔
بیشتر افراد کو علم نہیں ہوتا کہ اس ٹیپ کو متعدد کاموں کے لیے آسانی سے استعمال کیا جاسکتا ہے۔
تو جانیں کہ اس شفاف ٹیپ کو آپ کن کاموں کے لیے استعمال کرسکتے ہیں۔
کمپیوٹر کی بورڈ کی صفائی
کی بورڈ ایسی چیز ہے جس میں مٹی، ذرات اور کافی کچرا جمع ہوتا رہتا ہے اور اس کی صفائی آسان نہیں ہوتی۔
اس کی صفائی کے لیے کمپیریس ائیر کین استعمال کیے جاتے ہیں جو ہر ایک کو آسانی سے دستیاب نہیں ہوتے، مگر اسکاچ ٹیپ سے بھی ایسا ممکن ہے۔
ٹیپ کا ایک ٹکڑا کی بورڈ پر موجود گرد اور ننھے ذرات کو انتہائی مؤثر انداز سے اٹھا لیتا ہے۔
ٹوٹے ہوئے شیشے کے ٹکڑے اکٹھے کریں
اگر غلطی سے گلاس یا شیشے سے بنی کوئی چیز ٹوٹ جائے تو یہ خطرہ موجود ہوتا ہے کہ ننھے ذرات صفائی کے باوجود وہاں موجود ہوں جو پیروں میں گھس سکتے ہیں۔
تو اس سے بچنے کے لیے کچھ مقدار میں ٹیپ کو کسی بڑے کاغذ کے گرد لپیٹ لیں (ٹیپ کا چپکنے والا حصہ باہر کی جانب ہو) اور اس کاغذ کو فرش پر اچھی طرح پھیر لیں تاکہ شیشے کے تمام ننھے ذرات اس پر چپک جائیں۔
جوتوں کے تسموں کو ٹھیک کریں
جوتوں کے تسموں کے سرے اگر سائیڈ میں لٹکنے لگے تو جوتے بدنما لگنے لگتے ہیں، اس سے بچنے کے لیے اسکاچ ٹیپ کے ایک پتلے ٹکڑے کو تسموں کے سروں کے ارگرد لپیٹ دیں اور بس۔
کپڑوں سے بال اور دھاگے وغیرہ کی صفائی
لباس پر رُواں یا دھاگوں کا نکلنا ان کو بدنما بناتا ہے، تو اسکاچ ٹیپ کو ہیئر برش کے ہینڈل پر لپیٹ کر لباس کے اس حصے پر رگڑیں اور احتیاط سے واپس کھینچ لیں۔
کریڈٹ کارڈ کی مرمت کریں
بہت زیادہ سوائپنگ سے کریڈٹ کارڈ کی مقناطیسی پٹی ماند پڑنے لگتی ہے۔
اگر آپ کو لگے کہ کریڈٹ کارڈ معمول کی طرح کام نہیں کررہا تو اس پٹی کو اسکاچ ٹیپ کی پتلی تہہ سے ڈھانپ دیں۔
مگر یہ طریقہ زیادہ عرصے تک کام نہیں کرتا اور نیا کارڈ لینا ہی مستقل حل ہوتا ہے۔
اس ٹیپ کے طریقہ استعمال سے ہٹ کر ایک اور چیز لوگوں کے لیے اکثر مسئلے کا باعث بنتی ہے اور وہ ہے اس ٹیپ کے سرے کو تلاش کرنا۔
جی ہاں یہ مسئلہ اکثر افراد کو چڑچڑا بنا دیتا ہے کیونکہ ٹپ کے سرے کو تلاش کرنا مشکل ہو جاتا ہے۔
مگر اچھی بات یہ ہے کہ چند آسان طریقوں سے اس بظاہر معمولی مگر عام مسئلے سے بچنا بہت آسان ہو جاتا ہے۔
ٹوتھ پک سے مدد لیں
ٹیپ کاٹنے کے بعد ٹوتھ پک کو سرے کے نیچے چپکا دیں، اگلی بار جب ٹیپ استعمال کرنا ہو تو اس ٹوتھ پک سے علم ہو جائے گا کہ اس کا سرا کہاں موجود ہے۔
پیپر کلپ بھی مددگار ثابت ہوسکتی ہے
اپنے کام کے لیے ٹیپ کاٹ کر پیپر کلپ کو لیں اور اسے سرے کے نیچے چپکا دیں۔
اس طرح اگلی بار سرے کو تلاش کرنا بہت آسان ہو جائے گا۔
آنکھوں سے معائنہ کریں
اگر ٹیپ کے سرے کو تلاش کر رہے ہیں تو ٹیپ رول کو ہاتھوں میں پکڑ کر اسے غور سے دیکھیں اور انگلیوں کی مدد سے اس کے سرے کو تلاش کرنے کی کوشش کریں۔
یعنی انگلی درمیان میں رکھ کر آہستگی سے رول کو گھمائیں اور سرے کی سختی یا موٹائی کو محسوس کرنے کی کوشش کریں۔
اسی طرح تیز روشنی میں ٹیپ رول کو آہستگی سے گھما کر دیکھنے سے بھی سرے کو تلاش کرنے میں مدد مل سکتی ہے۔
آٹے سے بھی سرے کو تلاش کرنا ممکن
انگلی کو خشک آٹے میں ڈبو دیں جس سے کچھ مقدار میں ذرات انگلی میں لگ جائیں گے۔
اس کے بعد انگلی کو ٹیپ رول پر گھمائیں ایسا کرنے سے شفاف ٹیپ میں سرے کو تلاش کرنا آسان ہو جائے گا۔
اگر آٹا استعمال نہیں کرنا چاہتے تو ٹالکم پاؤڈر کو بھی استعمال کر سکتے ہیں۔
پینسل بھی مددگار
پینسل سے لکیر کھینچتے ہوئے ٹیپ رول کو آہستگی سے گھمائیں۔
اس لکیر سے ٹیپ کے سرے کو تلاش کرنا بہت آسان ہو جائے گا۔
ٹیپ کے سرے کو فولڈ کرلیں
ٹیپ کو کاٹ کر اس کے سرے کو فولڈ کر دیں تاکہ سطح سے چپکنے کی بجائے اوپر کی جانب اٹھ جائے۔
Leave a Reply