بالی وڈ اداکارہ سوناکشی سنہا نے جھوٹی خبریں دینے پر اپنے میڈیا کو مذاق قرار دے دیا۔
گزشتہ روز بھارتی میڈیا نے جھوٹی خبر پھیلائی کہ پاکستان نے مقبوضہ کشمیر اور بھارت کے دیگر علاقوں پر حملے کیے تاہم فوری طور پر پاکستان کی جانب سے کسی قسم کے حملوں کی تردید کی گئی۔
بھارتی میڈیا یہیں نہیں رکا بلکہ آپس میں ہی فیک نیوز میں مقابلہ شروع کردیا، آج تک ٹی وی ہو یا ٹائمز ناؤ یا انڈیا ٹی وی ہو یا ریپبلک ٹی وی ہر بھارتی نیوز چینل پاکستان پر حملوں کی ایک سے بڑھ کر ایک جعلی خبریں براہ راست نشر کرتا رہا۔
ایک دوسرے پر سبقت لے جانے کے چکر میں جعلی ویڈیوز اور جعلی خبریں عوام کو سناتے رہے لیکن بھارتی میڈیا کی پول پٹی صبح ہونے سے پہلے ہی کھل گئی اور بھارتی عوام ہی سوشل میڈیا پر ان کے دعوؤں کے ثبوت مانگنے لگی۔
اب بالی وڈ اداکارہ سوناکشی سنہا نے جھوٹی خبریں دینے پر اپنے ’گودی‘ میڈیا کو مذاق قرار دیتے ہوئے عوام سے نیوز چینلز نہ دیکھنے کی اپیل کردی۔
اپنی پوسٹ میں اداکارہ کا کہنا تھاکہ ہمارے نیوز چینل ایک مذاق ہیں، میں ان ڈرامائی مناظر، چیخنے چلانے سے تنگ آگئی ہوں، بھارتی میڈیا چیخ پکار سے کیا حاصل کرنا چاہتا ہے؟ انہوں نے کہا کہ لوگوں کو ہیجان میں مبتلا کرنے اور افرا تفری پھیلانے سے باز رہیں، نیوز کے نام پر بکواس دیکھنا بند کرو۔
اُدھر بھارتی شہری بھی اپنےمیڈیا پر برس پڑے اور کہاکہ بھارتی نیوز چینلز جھوٹ کا بازار بن گئے ہیں، بھارتی میڈیا قومی ہزیمت اور سبکی بن چکا ہے، میڈیا نے صحافتی اصولوں کی دھجیاں اڑادی ہیں، ایسے لوگوں کو قانون کے کٹہرے میں کیوں نہیں لایا جاتا۔
Leave a Reply