اسلام آباد: نیشنل ایمرجنسی آپریشن سینٹر (این ای او سی) نے خیبر پختونخوا کے ضلع لوئر کوہستان اور سندھ کے ضلع بدین سے پولیو کے 2 نئے کیسز کی تصدیق کردی۔
محکمہ صحت نے کوہستان لوئر کے علاقے پٹن میں 6 سال کی بچی میں پولیو وائرس کی تصدیق کی جس کے بعد خیبر پختونخوا میں رواں سال پولیو کیسز کی تعداد 13 ہوگئی ہے۔
محکمہ صحت کے مطابق بنوں اور لکی مروت سے 3، 3 جب کہ ٹانک اور شمالی وزیرستان سے 2، 2 پولیو کیسز رپورٹ ہوچکے ہیں، اس کے علاوہ ڈی آئی خان، تورغر اور کوہستان لوئر سے پولیو کا ایک، ایک کیس رپورٹ ہوچکا ہے۔
دوسری جانب سندھ کے ضلع بدین سے ایک پولیو کیس رپورٹ ہوا ہے جس کے بعد پاکستان میں رواں سال اب تک پولیو کے کیسز کی تعداد 21 ہوگئی ہے۔
این ای او سی کے مطابق پولیو ایک لاعلاج مرض ہے، بچاؤ صرف ویکسین سے ممکن ہے، ملک بھر میں انسدادِ پولیو کی خصوصی مہم یکم ستمبر سے شروع ہوگی۔
این ای او سی کا کہنا ہے کہ والدین اپنے بچوں کو قطرے پلوا کر عمر بھر کی معذوری سے بچاسکتے ہیں، پولیو ویکسین کے ساتھ حفاظتی ٹیکوں کا کورس بھی بروقت مکمل کروائیں۔
Leave a Reply