پاکستان سپر لیگ کی فرنچائز کوئٹہ گلیڈی ایٹرز نے پی ایس ایل کی تاریخ کا سب سے بڑا اسکور بناکر نیا ریکارڈ قائم کر دیا۔
بدھ کو پنڈی کرکٹ اسٹیڈیم میں کوئٹہ گلیڈی ایٹرز نے دفاعی چیمپئن اسلام آباد یونائیٹڈ کے خلاف رنز کے انبار لگاتے ہوئے پاکستان سپر لیگ کی تاریخ کا سب سے بڑا ٹوٹل اسکور بنایا۔
سعود شکیل کی قیادت میں گلیڈی ایٹرز نے اسلام آباد یونائیٹڈ کے خلاف مقررہ 20 اوورز میں 3 وکٹوں کے نقصان پر 263 رنز بنائے۔
کوئٹہ گلیڈی ایٹرز کےرائیلی روسو اور حسن نواز نے شاندار سنچریاں اسکور کیں اور بالترتیب 104 اور 100 رنز اسکور کیے۔
کوئٹہ کی جانب سے 263 رنز پی ایس ایل کی تاریخ میں کسی بھی ٹیم کا سب سے بڑا اسکور ہے۔
اس سے قبل یہ ریکارڈ ملتان سلطانز کے پاس تھا جس نے 2023 میں اسی گراؤنڈ پر کوئٹہ گلیڈی ایٹرز کے خلاف 262 اسکور کیے تھے۔
264 رنز کے ہدف کے جواب میں اسلام آباد یونائیٹڈ کی ٹیم 19.3اوورز میں 154 رنز پر ڈھیر ہوگئی اور یوں کوئٹہ گلیڈی ایٹرز نے 109 رنز سے کامیابی حاصل کرلی۔
میچ سے قبل اسٹیڈیم میں پاکستان کا قومی ترانہ بجایا گیا اور بھارتی حملوں کے نتیجے میں شہید ہونے والوں کی یاد میں ایک منٹ کی خاموشی بھی اختیار کی گئی۔
Leave a Reply