حال ہی میں پاکستان اور بھارت کے درمیان ہونے والی فضائی جھڑپ نے دنیا بھر کی توجہ حاصل کر لی اور کہا جارہاہے کہ یہ لڑائی جدید فضائی ہتھیاروں، پائلٹوں کی مہارت اور لڑاکا طیاروں کی کارکردگی کو جانچنے کا ایک بہترین موقع ہے۔
پاکستان اور بھارت کی فضائیہ کے درمیان 6 اور 7 مئی کی شب ہونے والی جھڑپ حالیہ تاریخ کی سب سے بڑی اور طویل ترین لڑائی ہے۔
اس فضائی جھڑپ میں چین کے تیار کردہ پاکستانی طیارے جے 10 اور فرانس کے بنائے گئے بھارتی رافیل لڑاکا طیارے آمنے سامنے آئے۔
سینیئر پاکستانی سکیورٹی ذرائع نے امریکی نشریاتی ادارے کو بتایا کہ ایک گھنٹے سے زائد جاری رہنے والی لڑائی میں دونوں طرف کے تقریباً125 طیارے شریک تھے، دونوں ملکوں کے جنگی طیارے اپنی فضائی حدود سے باہر نہیں نکلے۔ اس لڑائی کے دوران کچھ موقعوں پر 160 کلومیٹر کے فاصلے سے بھی ایک دوسرے پر میزائل داغے گئے۔
ترجمان پاک فوج کے مطابق پاکستان نے بھارتی حملوں کا بھرپور جواب دیتے ہوئے 5 بھارتی طیاروں کو مار گرایا جن میں 3 فرانسیسی ساختہ رافیل طیارے شامل تھے۔
برطانوی خبر رساں ایجنسی کے مطابق پاکستان اور بھارت کی فضائیہ کی یہ جھڑپ دنیا بھر کی افواج کی گہری توجہ کا مرکز بن گئی ہے۔
ماہرین کے مطابق یہ جھڑپ آئندہ جنگوں کے لیے حکمتِ عملی اور جنگی صلاحیتوں کا اندازہ لگانے کے لیے ایک بہترین موقع ہے۔
2 امریکی حکام نے خبر رساں ایجنسی رائٹرز کو بتایا کہ بدھ کو پاکستانی فضائیہ کے ایک چینی ساختہ جنگی طیارے نے کم از کم 2 بھارتی فوجی طیاروں کو مار گرایا۔
فضائی جھڑپ دیگر ممالک کی افواج کے لیے بھی ایک بہترین موقع ہوتی ہے کہ وہ اس لڑائی میں پائلٹس، لڑاکا طیاروں اور فضاء سے فضاء میں مار کرنے والے میزائلوں کی کارکردگی کا مطالعہ کریں اور اس معلومات کو اپنی فضائی افواج کو جنگ کے لیے تیار کرنے میں استعمال کریں۔
خبر رساں ایجنسی کے مطابق ماہرین کا کہنا ہے کہ بھارت اور پاکستان کی جانب سے جدید ہتھیاروں کے عملی استعمال کا دنیا بھر میں بالخصوص چین، امریکا اور دیگر یورپی ممالک میں تفصیلی تجزیہ کیا جائے گا۔
ایک امریکی اہلکار نےخبر رساں ایجنسی کو نام ظاہر نہ کرنے کی شرط پر تصدیق کی کہ پاکستان نے بھارت کے خلاف چینی ساختہ J-10 طیارے استعمال کیے اور ان سے بھارتی طیاروں پر ایئر ٹو ایئر میزائل داغے۔
انٹرنیشنل انسٹیٹیوٹ فار اسٹریٹیجک اسٹڈیز کے سینیئر رکن کا کہنا ہے امریکا اور کئی یورپی ممالک کی فضائیہ پاک بھارت معرکے میں استعمال ہونے والے ہتھیاروں، طریقہ کار اور حکمتِ عملی کے ہر پہلو کا گہرائی سے تجزیہ کریں گی۔
پاک بھارت جھڑپ جدید فضائی ہتھیاروں، پائلٹوں کی مہارت، اور لڑاکا طیاروں کی کارکردگی کو جانچنے کا ایک بہترین موقع ہے۔
Leave a Reply