اسلام آباد: وزیراعظم شہباز شریف نےکہا ہےکہ پاکستان میں سب کو سیاست کا حق ہے مگر ریاست کے خلاف بغاوت کا نہیں، سب کو احتجاج کا حق ہے، جلاؤ گھیراؤ اورگالی کا نہیں۔
جناح اسپورٹس کمپلیکس اسلام آباد میں میں یوم آزادی اورمعرکہ حق میں فتح کی تقریب سے خطاب کرتے ہوئے وزیراعظم کا کہنا تھا کہ وقت آچکاہے کہ ہم سیاسی تقسیم، ذاتی مفادات اورکھوکھلے نعروں سے آگے بڑھیں، ہم آگے بڑھ کرپاکستان کے لیے اجتماعی سوچ اپنائیں، آج کے عظیم دن پر تمام سیاسی جماعتوں، اسٹیک ہولڈرز اور سول سوسائٹی کو میثاق استحکام پاکستان کا حصہ بننے کے لیے دعوت دیتا ہوں۔
وزیراعظم شہباز شریف کا کہنا تھا کہ یہ میثاق معیشت کی بحالی کا منصوبہ نہیں وسیع ترقومی مفاد کی بنیاد ہے، چاہتے ہیں کہ پوری دنیا دیکھ سکےکہ ہمارے اختلافات اپنی جگہ مگر پاکستان کی خاطرہم ایک ہیں، ہم نے دہشت گردی کے خلاف جنگ میں لازوال قربانیاں دی ہیں، اس جنگ میں 90 ہزار پاکستانی شہید ہوئے، 150 ارب ڈالرز کا مالی نقصان ہوا ہے۔
اب ہم کسی نئے فتنےکو جگہ نہیں دیں گے: وزیراعظم شہباز شریف
وزیراعظم کا کہنا تھا کہ اب ہم کسی نئے فتنےکو جگہ نہیں دیں گے، پاکستان میں سب کو احتجاج کا حق ہے لیکن جلاؤ گھیراؤکا نہیں، تنقید کا حق ہے لیکن توہین اورگالی کا نہیں، سیاست کا حق ہے لیکن ریاست کے خلاف بغاوت کا نہیں، ہم اس کو کسی صورت پنپنے نہیں دیں گے۔
معرکہ حق نے ثابت کیا کہ ہم آزادی کی حفاظت کرنےکی طاقت رکھتے ہیں: وزیراعظم
آزادی کا ذکر کرتے ہوئے ان کا کہنا تھا کہ یہ صرف آزادی کی جنگ نہیں دو قومی نظریےکی فتح تھی، تحریک پاکستان کے تمام قائدین اورکارکنوں کوسلام عقیدت پیش کرتا ہوں، ہم نے جشن آزادی کو معرکہ حق کا نام دیا ہے، 4 دن کے اندربھارت کا غرور مٹی میں مل گیا، بھارت کی آنے والی نسلیں اس شکست کویاد رکھیں گی، بھارت نے پاکستان پر حملہ کیا، اس کو گھمنڈ تھا کہ اپنی جنگی طاقت سے پاکستان کو زیرکرےگا، معرکہ حق نے ثابت کیا کہ ہم اس آزادی کی حفاظت کرنے کی طاقت رکھتے ہیں، ہماری ایٹمی طاقت کسی طورپرجارحانہ سوچ نہیں رکھتی، ہم نے بھارت کی جوہری طاقت کےمقابلے میں ایٹمی طاقت کے حصول کا راستہ اپنایا۔
ان کا کہنا تھا کہ ہمارے دوست ممالک نے مشکل گھڑی میں ہمارا حوصلہ بڑھایا۔ چین، سعودی عرب، ترکیہ، آذربائیجان، یو اے ای اور ایران نے پاکستانی مؤقف کی کھل کرحمایت کی، امریکی صدر کا شکریہ ادا کرتا ہوں جنہوں نے جنگ بندی کے لیے ٹھوس کوششیں کیں، امید ہے ٹرمپ کشمیرکا مسئلہ اقوام متحدہ کی قراردادوں کے مطابق حل کروائیں گے۔
وزیراعظم کا کہنا تھا کہ پاکستان بحران سے نکل کر نئے معاشی دور میں داخل ہو رہا ہے، مہنگائی کی سطح جو 34 فیصد پر پہنچ گئی تھی آج 5 فیصد پر آگئی ہے، شرح سود 21 فیصد سے 11 فیصد پر آگئی ہے، یہ صرف آغاز ہے، مستقبل کی راہیں ہمیں شبانہ روز محنت سے طے کرنی ہیں، فیلڈ مارشل سید عاصم منیر کا شکریہ جنہوں نے سول حکومت سے بھرپور تعاون کیا، عدلیہ کے تعاون سے قومی خزانے میں 100 ارب روپے سے زیادہ رقوم جمع ہوئیں۔
وزیراعظم کا مزید کہنا تھا کہ غزہ اور کشمیر میں بے گناہوں کا خون بہتا ہے، فلسطین اور کشمیر کے عوام کے ساتھ حقوق حاصل ہونے تک کھڑے رہیں گے۔
Leave a Reply