قومی ون ڈے کرکٹ ٹیم کےکپتان اور وکٹ کیپر بیٹر محمد رضوان کا پاک بھارت کشیدگی کے حوالے سے بیان سامنے آگیا۔
سوشل میڈیا پر جاری بیان میں محمد رضوان کا کہنا تھا کہ ہم نے اللہ تعالیٰ کے پاک کلام سے یہ سیکھا ہےکہ جنگ نہ کرو لیکن اگر تم پر جنگ مسلط کر دی جائے تو پھر پیچھے نہ ہٹو۔
محمد رضوان کا کہنا تھا کہ پاکستان ایک طویل عرصے سے دہشت گردی کا شکار رہا ہے، ہماری نسلیں گولیوں کی تڑتڑاہٹ اور دھماکوں کی گونج سن کر بڑی ہوئی ہیں، اس مٹی میں شہیدوں کا لہو شامل ہے اور یہاں آج بھی ایسے نوجوان زندہ ہیں جو موت سے ویسے ہی محبت کرتے ہیں جیسے کچھ لوگ زندگی سےکرتے ہیں۔
ان کا کہنا تھا کہ ایسی قوم کو کوئی شکست نہیں دے سکتا، ان پر مسلط کی گئی ہر جنگ انہیں مزید جوڑتی ہے، جگاتی ہے اور مضبوط بناتی ہے۔
محمد رضوان کا کہنا تھا کہ یہ پیغام ان سب کے لیے ہے جو سمجھنےکی صلاحیت رکھتے ہیں۔ ہم نے حوصلہ رکھنا ہے، یقین رکھنا ہے، نہ ظلم کرنا ہے نہ ظلم سہنا ہے۔
خیال رہےکہ بھارت کی جانب سے مسلسل جارحیت اور دراندازی کے باعث پاکستان سپر لیگ (پی ایس ایل) 10 کے آئندہ میچز خطرے میں پڑگئے۔
ذرائع کے مطابق سکیورٹی صورتحال اور ائیراسپیس بند ہونے سے پیچیدہ صورتحال در پیش ہوسکتی ہے اور پی ایس ایل میچز ملتوی ہونےکا امکان بڑھ گیا ہے۔
Leave a Reply