ڈیلس : پاکستان میں کروڑوں کا بزنس کرنے والی جیو کی فلم ’ دیمک ‘ اب امریکا میں بھی اپنی کامیابی کے جادو سے ناظرین کو متاثر کر رہی ہے۔
ڈیلس کے معروف اینجلیکا فلم سینٹر میں اس فلم کی خصوصی اسکریننگ اور ریڈ کارپٹ ایونٹ کا اہتمام کیا گیا، جس میں بڑی تعداد میں پاکستانی، انڈین اور جنوبی ایشیائی کمیونٹی کے افراد نے شرکت کی۔
اس یادگار تقریب کا انعقاد ریڈیو آزاد او ر واہ واہ پروڈکشنز کے اشتراک سے کیا گیا، ریڈ کارپٹ پر فلم کی مرکزی اداکارہ سونیا حسین، سمن انصاری، ہدایتکار رافیع راشدی اور پروڈیوسر سید مراد علی نے شرکت کی، تقریب میں موجود حاضرین نے فلم کے موضوع، اداکاری، اور جدید وی ایف ایکس مناظر کو بھرپور انداز میں سراہا۔
ہدایتکار رافیع راشدی نے کہا کہ پاکستان کے بعد ہمیں دنیا بھر سے بہت اچھا اچھا رسپانس مل رہا ہے اور وہ اس ضمن میں دیمک ٹو بنانے پر سنجیدگی سے غور کررہے ہیں۔
ہدایتکار رافیع راشدی نے گفتگو کرتے ہوئے کہا کہ ’ یہ صرف ایک خوفناک فلم نہیں، بلکہ ایک ایسا فنی تجربہ ہے جس کے ذریعے کئی سماجی اور نفسیاتی پیغامات دیے گئے ہیں، ہم نے کوشش کی کہ آرٹ، جذبات، اور حقیقت کے بیچ توازن قائم رہے‘۔
اداکارہ سونیا حسین نے کہا کہ ’ امریکا میں کمیونٹی کی محبت اور پذیرائی کا جذبہ قابلِ تحسین ہے، میرا کردار بہت جذباتی اور چیلنجنگ تھا ، اس میں انسان کے اندر چھپی کمزوریوں اور طاقت کو ظاہر کیا گیا ہے‘۔
اداکارہ سمن انصاری نے فلم کی پروفیشنل کوالٹی کو سراہتے ہوئے کہا کہ یہ فلم پاکستانی سینما کے نئے دور کی نمائندگی کرتی ہے جس نے کم بجٹ میں عالمی معیار کی پروڈکشن پیش کی اور یہ ہمارے لیے فخر کی بات ہے‘۔
پروڈیوسر سید مراد علی نے کہا کہ ’ دیمک کو پاکستان میں بھرپور پذیرائی ملی اور اب ہمیں امریکا، کینیڈا اور یورپ میں بھی شاندار رسپانس مل رہا ہے، ہمارا مقصد یہ دکھانا ہے کہ پاکستان میں عالمی معیار کی فلمیں کم وسائل میں بھی بن سکتی ہیں، ان کا کہنا تھا کہ امریکا کینڈا اور یورپ میں دیمک یہ ایونٹس پاکستانی ثقافت کو دنیا کے سامنے لانے کا ذریعہ ہیں ، ہمیں خوشی ہے کہ دیمک نے ناظرین کو متاثر کیا‘۔
ڈیلس کے اینجلیکا فلم سینٹر میں پاکستانی فلم ‘ دیمک‘ کی خصوصی نمائش کے دوران فلم بینوں کی بڑی تعداد موجود تھی، شائقین نے فلم کو بھرپور توجہ اور دلچسپی کے ساتھ دیکھا، اور اس کے پیغام اور کہانی سے گہری وابستگی کا اظہار کیا، اسکریننگ کے بعد ایک سوال و جواب کا سیشن رکھا گیا، جس میں ناظرین نے فلم کے موضوع، علامتی پہلوؤں اور کرداروں پر اپنے خیالات پیش کیے۔
اس ایونٹ کی نظامت ریڈیو آزاد کے معروف اینکرز آزاد خان اور عائشہ سیانی نے انجام دی، جنہوں نے نہایت خوبصورتی سے تقریب کو آگے بڑھایا، شائقین نے فلم کے پیغام، کہانی، اور کرداروں سے متعلق دلچسپ سوالات کیے، جن پر فلم کی ٹیم نے تفصیل سے گفتگو کی حاضرین کا کہنا تھا:
‘ دیمک ایک شاندار فلم ہے! پاکستانی سنیما اب واقعی ایک نئے دور میں داخل ہو چکا ہے، بین الاقوامی معیار کی طرف بڑھتا ہوا، اور دیمک اسی سفر کا ایک روشن حصہ ہے‘۔
ناظرین نے کہا کہ فلم دیمک نے انسان کے اندر چھپے خوف، تعلقات، اور نفسیاتی کشمکش کو نہایت خوبصورت انداز میں پیش کیا ہے، اس میں فن اور حقیقت کے درمیان ایک ایسا توازن دکھایا گیا ہے جو ہر دل کو چھو لیتا ہے، شائقین نے اس فلم کو ایک تخلیقی اور فکری کاوش قرار دیا جو فن، ثقافت، اور سماجی شعور کو یکجا کرتی ہے۔
پاکستانی کمیونٹی کا کہنا تھا کہ’ یہ فلم نہ صرف پاکستانی سنیما کی بین الاقوامی کامیابی کا جشن ہے بلکہ امریکا میں بسنے والی دیسی کمیونٹی کے لیے فخر کا لمحہ بھی‘۔
Leave a Reply