کینیڈا کے وزیر اعظم مارک کارنی نے کہا ہے کہ انہوں نے امریکی صدر ڈونلڈ ٹرمپ سے ایک اینٹی ٹیرف سیاسی اشتہار کے معاملے پر معافی مانگ لی ہے۔
مارک کارنی نے مزید کہا کہ انہوں نے ریاست اونٹاریو کے وزیر اعلیٰ ڈگ فورڈ کو یہ اشتہار نشر نہ کرنے کی ہدایت دی تھی۔
مارک کارنی نے جنوبی کوریا میں ایشیا پیسیفک سربراہی اجلاس میں شرکت کے بعد صحافیوں سے گفتگو کرتے ہوئے کہا کہ انہوں نے بدھ کے روز جنوبی کوریا کے صدر کی جانب سے دیے گئے عشائیے کے دوران ٹرمپ سے ذاتی طور پر معذرت کی۔
مارک کارنی نے یہ بھی بتایا کہ انہوں نے اشتہار نشر ہونے سے پہلے ڈگ فورڈ کے ساتھ اس کا جائزہ لیا تھا لیکن اس کے استعمال کی مخالفت کی تھی۔
غیر ملکی خبررساں ایجنسی کے مطابق یہ اشتہار ڈگ فورڈ نے تیار کروایا تھا جو ایک قدامت پسند رہنما ہیں اور انہیں اکثر ٹرمپ سے مشابہت دی جاتی ہے۔
اس اشتہار میں ریپبلکن پارٹی کے سابق صدر رونلڈ ریگن کا ایک بیان شامل کیا گیا تھا جس میں وہ کہتے ہیں کہ ٹیرف سے تجارتی جنگیں اور معاشی تباہی جنم لیتی ہیں۔
اس کے جواب میں ٹرمپ نے کینیڈا سے آنے والی مصنوعات پر ٹیرف بڑھانے کا اعلان کیا تھا اور امریکا نے کینیڈا کے ساتھ تجارتی مذاکرات بھی روک دیے تھے۔
رواں ہفتے کے آغاز میں جنوبی کوریا سے روانگی کے موقع پر ٹرمپ نے کہا تھا کہ ان کی مارک کارنی سے عشائیے میں ’بہت خوشگوار گفتگو‘ ہوئی تاہم انہوں نے تفصیلات نہیں بتائیں۔
Leave a Reply