اقوام متحدہ میں پاکستان کے مستقل مندوب عاصم افتخار نے کہا ہے کہ پاکستان ڈائیلاگ اور سفارت کاری کے ذریعے تنازعات کے حل کا حامی ہے۔
پاکستانی مندوب عاصم افتخار نے کہا کہ روس یوکرین جنگ کے خطے پر گہرے اثرات ہو رہے ہیں، تنازعات کے حل کے لیے بات چیت کا راستہ اختیار کیا جائے۔
انہوں نے کہا کہ روس یوکرین جنگ کے حوالے سے پاکستان کو خدشات ہیں، اس جنگ کے نتیجے میں انسانوں کو مشکلات کا سامنا ہے، عالمی قوانین کے تحت شہریوں اور انفرااسٹرکچر کی حفاظت یقینی بنائی جائے۔
پاکستانی مندوب نے واضح کیاکہ روس یوکرین تنازع کا کوئی فوجی حل نہیں، فریقین تصادم اور کشیدگی کے خاتمے کی طرف قدم بڑھائیں، مذاکرات سے مسائل حل کریں، مذاکرات سے حل کی جانے والی تمام کوششوں کی حمایت کرتے ہیں۔
یاد رہے کہ امریکی میڈیا کی جانب سے گزشتہ دنوں یہ خبر دی گئی تھی کہ ٹرمپ انتظامیہ خفیہ طور پرروس کی مشاورت سے یوکرین جنگ کے خاتمے کا نیا منصوبہ بنارہی ہے اور امریکی خصوصی ایلچی اسٹیو وٹکوف نئے منصوبےکی قیادت کررہے ہیں۔
تاہم گزشتہ روز امریکی میڈیا نے یہ دعویٰ کیا کہ صدر ٹرمپ نے خاموشی سے رواں ہفتے روس یوکرین امن منصوبے کی منظوری دے دی ہے۔
رپورٹ کے مطابق روس اوریوکرین کی جنگ کےخاتمے کے 28 نکات پر مشتمل روڈ میپ میں یوکرین میں امن اور سکیورٹی گارنٹی شامل ہے جب کہ یورپ کی سلامتی اور مستقبل میں امریکا کے روس اوریوکرین سے تعلقات کے معاملات بھی شامل ہیں۔
Leave a Reply