لاہور: انسداد دہشت گردی عدالت نے علیمہ خان کے بیٹے شیر شاہ کا 5 دن کا جسمانی ریمانڈ منظور کر لیا۔
لاہور کی انسداد دہشت گردی عدالت کے جج منظر علی گل نے پولیس کی درخواست پر محفوظ فیصلہ سناتے ہوئے 9 مئی کے مقدمات میں گزشتہ روز گرفتار کیے گئے علیمہ خان کے بیٹے شیر شاہ کا 5 روز کا جسمانی ریمانڈر منظور کیا۔
نومئی مقدمے کی سماعت انسداددہشت گردی عدالت لاہور میں ہوئی جس دوران علیمہ خان کے بیٹے شیر شاہ کو سخت سکیورٹی میں عدالت میں پیش کیا گیا۔
تفتیشی افسر نے عدالت کو بتایا کہ ملزم کو 9 مئی جناح ہاؤس حملے کے مقدمے میں گرفتار کیا گیا۔
پولیس کی جانب سے ملزم شیر شاہ کے 30 روزہ ریمانڈ کی استدعا کی گئی اور کہا گیا کہ ملزم موقع پر حسان نیازی کے ساتھ موجود تھا، اور لوگوں کو جلاؤ گھیراؤ پر اکسا رہا تھا۔
انسداد دہشت گردی عدالت نے پولیس کی درخواست پر فیصلہ محفوظ کر لیا تھا۔
Leave a Reply