وزیر اطلاعات پنجاب عظمیٰ بخاری کا کہنا ہےکہ مریم نواز کی کارکردگی کی تعریف بلاول بھٹو نے بھی کی ہے، اسی لیے سندھ کے لوگ بھی چاہتے ہیں کہ کاش ان کے پاس بھی مریم نواز جیسی وزیراعلیٰ ہوتی۔
پیپلز پارٹی کے رہنماؤں کے بیان پر ردعمل میں وزیر اطلاعات پنجاب عظمیٰ بخاری کا کہنا تھا کہ آپ پنجاب میں رہ کر پنجاب کا مقدمہ کب لڑیں گے؟ ایک طرف آپ کہہ رہے ہیں گندم کا نقصان ہوا اور دوسری طرف کہتے ہیں گندم باہر بھیج دیں۔
عظمیٰ بخاری کا کہنا تھا کہ کوئی بے نظیر انکم سپورٹ پروگرام ختم نہیں کرنا چاہتا، سوال یہ ہے اس کو سیلاب میں استعمال کیوں کرنا چاہتے ہیں؟ بے نظیر انکم سپورٹ پروگرام کا اپنا قانون اور طریقہ کار ہے، اس کو بار بار سیلاب میں کیوں لا رہے ہیں ؟اس کو سیاست ہی کہتے ہیں۔
ان کا مزید کہنا تھا کہ آپ اتنے سیانے ہوتے تو آج پنجاب میں آپ کی یہ حالت نہ ہوتی، مریم نواز کی کارکردگی کی تعریف بلاول بھٹو نے بھی کی ہے، اسی لیے سندھ کے لوگ بھی چاہتے ہیں کہ کاش ان کے پاس بھی مریم نواز جیسی وزیراعلیٰ ہوتی۔
دوسری جانب پیپلز پارٹی کے رہنما ندیم افضل چن نے بھی حکومت سے سیلاب متاثرین کی مدد کےلیے بے نظیر انکم سپورٹ پروگرام استعمال کرنے کا مطالبہ کردیا ہے۔
ندیم افضل چن نے کہا ہےکہ بے نظیر انکم سپورٹ پروگرام کے پاس ڈیٹا بینک ہے، اس کا ڈیٹا استعمال کریں، آپ جس کی مرضی تصویر لگائیں مگر غریب تک پیسے پہنچائیں، کسان متاثر ہوئے ہیں،کسانوں سے مشورہ کریں، وزیراعلیٰ پنجاب کسانوں کو ہی بلا کر پوچھ لیتیں کہ ان کا کیا نقصان ہوا ہے۔
Leave a Reply