کراچی میں منگل کے روز ہونے والی بارش کے بعد سے متعدد علاقے تاحال بجلی سے محروم ہیں۔
کراچی کے علاقے صدر میں رتن تلاو، اردو بازار اور قرب و جوار کے علاقے میں منگل سے بجلی معطل ہے۔
ملیر عالمگیر سوسائٹی، کشمیر کالونی سیکٹر بی، جیل روڈ، جمشید روڈ، المسلم ہاؤسنگ سوسائٹی اسکیم 38، گلستان جوہر بلاک 8، جوہر بلاک 2، بلاک 3 اے، نارتھ ناظم آباد بلاک جی، ایف، عمر کالونی، درویش کالونی، پی ای سی ایچ ایس بلاک سیون، مرچنٹ نیوی سوسائٹی اسکیم 33 سیکٹر 15 اے، لیاقت آباد سی ون ایریا سمیت متعدد علاقے شامل ہیں۔
گلستان جوہر بلاک 8 میں بھی 2 دن سے بجلی معطل ہے جس سے علاقہ مکین پانی کی قلت سے شدید پریشان ہے۔
علاقہ مکینوں کا کہنا ہےکہ صبح 5 بجے چند لمحے کے لیے بحال بجلی پھر بند ہوگئی، متعدد بار شکایات کے باوجود فالٹس درست نہیں کیے جا رہے۔
دوسری جانب کے الیکٹرک کے چیف ایگزیکٹو مونس علوی نے دعویٰ کیا ہے کہ بدھ کی شام 6 بجے تک شہر کے 94 فیصد سے زائد علاقوں کو بجلی کی فراہمی بحال کر دی گئی تھی۔
مونس علوی کے مطابق شہر کے تقریباً 150 فیڈرز پر بجلی بحالی کا کام جاری ہے، بارش کی وجہ سے کے الیکٹرک فیلڈ اسٹاف کو آمدورفت میں شدید مشکلات کا سامنا تھا۔
Leave a Reply