انٹرنیشنل کرکٹ کونسل (آئی سی سی) نے ستمبر میں یو اے ای میں ہونے والے ایشیا کپ کے دوران کوڈ آف کنڈکٹ کی خلاف ورزی پر پاکستانی اور بھارتی کھلاڑیوں کو سزائیں سنادیں۔
آئی سی سی نے پاکستانی فاسٹ بولر حارث رؤف کو کوڈ آف کنڈکٹ کی خلاف ورزی کا مرتکب قرار دیتے ہوئے میچ فیس کا 30 فیصد جرمانہ عائد کیا ہے۔
آئی سی سی کے مطابق حارث رؤف کو دو ڈی میرٹ پوائنٹس بھی دیےگئے ہیں اور 2 میچز کی پابندی بھی عائد کی گئی ہے۔
آئی سی سی کے مطابق حارث رؤف ایشیا کپ کے فائنل میں ایک بار پھر کوڈ آف کنڈکٹ کی خلاف ورزی کرتے پائےگئے جس پر انہیں مزید دو ڈی میرٹ پوائنٹس دیےگئے۔
حارث کو 24 ماہ میں چار ڈی میرٹ پوائنٹس کی وجہ سے 2 معطلی کے پوائنٹس ملے ہیں جس کی وجہ سے ان پر 2 میچز کی پابندی لگائی گئی ہے۔
2 میچز کی پابندی کے باعث حارث رؤف کو جنوبی افریقا کے خلاف ون ڈے سیریز کے پہلے دو میچز 4 اور 6 نومبر کے لیے معطل کیا گیا ہے۔
آئی سی سی نے پاکستانی بیٹر صاحبزادہ فرحان کو آفیشل وارننگ جاری کی ہے۔
آئی سی سی کی جانب سے بھارتی ٹیم کےکپتان سوریا کمار یادیو پر بھی میچ فیس کا 30 فیصد جرمانہ عائد کیا گیا ہے، سوریا کمار یادیو کو بھی دو ڈی میرٹ پوائنٹس دیےگیے ہیں۔
آئی سی سی کے مطابق 28 ستمبر کے فائنل میچ میں جسپریت بمراہ نے اپنی غلطی تسلیم کی، جسپریت بمراہ کو آفیشل وارننگ جاری کی گئی ہے، انہیں ایک ڈی میرٹ پوائنٹ دیا گیا ہے۔
دوسری جانب بھارتی فاسٹ بولر ارشدیپ سنگھ سزا سے بچ گئے، ارشدیپ کوڈ آف کنڈکٹ کی خلاف ورزی کے مرتکب قرار نہیں دیے گئے۔
Leave a Reply