وزیر داخلہ سندھ ضیا الحسن لنجار کا کہنا ہے کہ کراچی ائیرپورٹ کے قریب حملے میں استعمال ہونے والی گاڑی کراچی سے خریدی گئی اور رقم کی ادائیگی نجی بینک کے ذریعے کی گئی، حملے کی سہولت کاری میں رکشہ ڈرائیور اور بینک ملازم بھی شامل ہیں۔
کراچی میں پریس کانفرنس کرتے ہوئے وزیر داخلہ ضیا لنجار کا کہنا تھا کہ کراچی ائیرپورٹ پر حملے میں دو چینی شہری ہلاک ہوئے، دھماکےکی جگہ سے ایک گاڑی کا چیچس اور نمبر پلیٹ ملی، حملہ آور شاہ فہد کی شناخت فنگر پرنٹس سے کی گئی۔
ضیا لنجار نے بتایا کہ حملے میں استعمال گاڑی کراچی سے خریدی گئی، ادائیگی حب کے نجی بینک کے ذریعے کی گئی، مزید کارندے دانش، گل رحمان اور بشیر زید ابھی تک گرفتار نہیں ہوئے۔
انہوں نے بتایا کہ دو ملزمان فرحان اور محمد سعید بھی حملہ آور کے سہولت کار ہیں، فرحان اور محمد سعید رکشہ ڈرائیور ہیں اور حملہ آور کے سہولت کار ہیں، سہولت کاری میں سعید علی اور بینک ملازم بلال بھی شامل تھے۔
وزیر داخلہ سندھ کا کہنا تھا کہ ملزم جاوید نے ائیرپورٹ کے ا ندر سے چائینز کے باہر نکلنے کی فون پر اطلاع دی، حملہ آور سے ملزم جاوید رابطے میں تھا، حملے میں ملوث 3 دہشت گردوں کو گرفتار کیا گیا۔
حملے میں کالے رنگ کی ڈبل کیبن گاڑی استعمال کی گئی: تفتیشی ذرائع
دوسری جانب کراچی ائیرپورٹ کے قریب خود کش دھماکے کی تفتیش میں پیشرفت سامنے آئی ہے اور حملے میں استعمال ہونے والی گاڑی کا پتہ چل گیا ہے۔
تفتیشی ذرائع کے مطابق حملے میں سیاہ رنگ کی ڈبل کیبن گاڑی استعمال کی گئی، گاڑی میں حملہ آور اور اس کی سہولت کار خاتون بھی تھی، مبینہ ملزمہ کو بلوچستان سے حراست میں لے لیا گیا ہے۔
ذرائع کا بتانا ہے کہ خودکش حملہ آور کے دیگر ساتھی بھی گرفتار ہیں جن سے تفتیش جاری ہے، گرفتار دہشت گردوں کے قبضے سے خود کش جیکٹ اور بارودی مواد بھی برآمد ہوا ہے۔
ذرائع کا بتانا ہے ممکنہ طور پر سائٹ ایریا میں غیر ملکیوں پر فائرنگ بھی گرفتار دہشتگردکے سہولت کار نے کی، ایک مبینہ خود کش حملہ آور کو بھی حراست میں لیا گیا ہے۔
Leave a Reply