[ad_1]
اداکارہ ماہرہ خان نے انکشاف کیا ہے کہ وہ خیبر پختونخوا میں حالیہ سیلاب کی لہر کے دوران نتھیا گلی میں موجود تھیں جہاں سے واپسی پر وہ شدید خوف کا شکار رہیں۔
ماہرہ خان نے انسٹاگرام اسٹوری میں انکشاف کیا کہ وہ خیبر پختونخوا کے ضلع ایبٹ آباد کے سیاحتی مقام نتھیا گلی سے واپسی پر سیلاب اور لینڈ سلائیڈنگ کے خطرے کا شکار ہوئیں۔
اداکارہ نے اسٹوری میں بتایا کہ ایک روز قبل ہی وہ نتھیا گلی سے واپس آ رہیں تھیں تو راستے میں انہیں شدید خوف نے آن گھیرا اور خود کو بے بس محسوس کیا۔
ماہرہ خان نے لکھا کہ نتھیا گلی سے واپسی پر ہر لمحے مجھے خوف آتا رہا کہ میں سیلاب یا لینڈ سلائیڈنگ کا شکار نہ ہوجاؤں، اُس وقت مجھے سیلاب سے متاثرہ افراد کا خیال بھی آیا۔
اداکارہ نے لکھا کہ مجھے احساس ہے کہ سیلاب یا لینڈ سلائیڈنگ کی زد میں آنے والے افراد کس طرح بے بس ہوتے ہوں گے، کس طرح لوگ قدرتی آفات کے آگے بے بس ہوتے ہوئے اپنی زندگیاں، اپنے پیاروں اور گھر والوں کو ڈوبتے ہوئے دیکھتے ہوں گے۔
ماہرہ خان نے ملک میں حالیہ بارشوں اور سیلاب کی تباہ کاریوں کے پیش نظر اللہ سے رحم کی دعا بھی مانگی۔
یہاں یہ بات بھی قابلِ ذکر ہے کہ ماہرہ نے واضح طور پر اپنے ساتھ پیش آنے والے واقعے کی تفصیلات نہیں بتائیں۔
خیال رہے کہ پاکستان بھر میں شدید بارشوں کا سلسلہ جاری ہے جب کہ خیبرپختونخوا اور گلگت بلتستان میں بارشوں کے بعد سیلاب اور لینڈ سلائیڈنگ کے واقعات میں اب تک 400 سے زائد افراد زندگیاں کھو بیٹھے ہیں۔
[ad_2]
Source link
Leave a Reply