فلم، ٹی وی کے نامور اداکار اور صداکار شجاعت ہاشمی لاہور میں سپرد خاک

فوٹو: فائل

پاکستانی فلم، ٹی وی کے نامور اداکار اور صداکار شجاعت ہاشمی کو لاہور کے مقامی قبرستان میں سپرد خاک کر دیا گیا۔

اداکار اور صداکار شجاعت ہاشمی کا جمعہ کو لاہور میں انتقال ہوا۔ وہ کچھ دنوں سے علیل تھے اور اسپتال میں زیر علاج تھے۔

انہوں نے 1967 میں اداکاری کے میدان میں قدم رکھا اور 1994 میں پرائڈ آف پرفارمنس حاصل کیا۔

شجاعت ہاشمی کو معروف ڈرامہ سیریل وارث میں مولاداد کے کردار نے شہرت کی بلندیوں پر پہنچا یا۔

شجاعت ہاشمی کو لاہورکے مقامی قبرستان میں سپرد خاک کردیا گیا ۔ ان کی نمازجنازہ میں مرحوم کے عزیز اقارب اور شوبز کی شخصیات نے شرکت کی۔

شجاعت ہاشمی کے کیریئر پر ایک نظر

1967 میں چکلالہ سینٹر راولپنڈی سے فنی سفر کا آغاز کرنے والے اس عظیم فنکار نے کئی نسلوں کے دلوں پر اپنی اداکاری کی چھاپ چھوڑی۔

شجاعت ہاشمی نے پی ٹی وی ڈراموں سے فنی سفر شروع کیا۔ معروف ڈرامہ سیریل وارث میں مولاداد کے کردار نے انہیں ملک گیر شناخت بخشی۔

شجاعت ہاشمی نے 1975 میں فلمی دنیا میں قدم رکھا۔ پہلی فلم چھڈ برے دی یاری تھی، 1979 میں فلم خاک اور خون میں مرکزی کردار ادا کیا جسے بہت سراہا گیا۔ اس کے بعد فلموں اور ڈراموں کی ایک طویل فہرست ان کے کریڈٹ پر آتی گئی۔

شجاعت ہاشمی نے ٹی وی اور فلم دونوں میدانوں میں اپنی صلاحیتوں کا لوہا منوایا۔

1994 میں اداکاری کے شعبے میں گراں قدر خدمات پر انہیں پرائیڈ آف پرفارمنس سے نوازا گیا۔چند روزہ علالت کے بعد شجاعت ہاشمی خالقِ حقیقی سے جا ملے۔ ان کی وفات سے شوبز انڈسٹری کا ایک سنہری باب بند ہو گیا۔

شجاعت ہاشمی کی یادیں، ان کے کردار اور ان کی فنکارانہ میراث ہمیشہ زندہ رہیں گی۔