راولپنڈی پولیس کا منشیات فروشوں کی پشت پناہی کا انکشاف، کئی افسران و اہلکار برطرف

برطرف کیے گئے تمام پولیس اہلکار تھانہ نیو ٹاؤن میں تعینات تھے، ایس ایچ او تھانہ نیو ٹاؤن انوارالحق کو بھی نوکری سے برخاست کر دیا گیا ہے: ترجمان راولپنڈی پولیس۔ فوٹو فائل

راولپنڈی پولیس کا منشیات فروشوں سے تعلقات اور ان کی پشت پناہی کا انکشاف ہوا ہے۔

سی پی او راولپنڈی سید خالد ہمدانی نے منشیات فروشوں سے تعلقات کے الزامات پر17 پولیس افسران و اہلکار برطرف کر دیے، برطرف افسران و اہلکاروں میں 1 سب انسپکٹر، 4 اےایس آئی، 4 ہیڈ کانسٹیبل اور 8 کانسٹیبل شامل ہیں۔

راولپنڈی پولیس کا کہنا ہے کہ منشیات کے خلاف کریک ڈاؤن میں پولیس افسران و اہلکاروں کی اسکروٹنی کی گئی، روابط سامنے آنے پر سینئر افسران پر مشتمل ٹیم نے معاملےکی تحقیقات کیں۔

ترجمان راولپنڈی پولیس کے مطابق برطرف افسران و اہلکاروں کے منشیات فروشوں سے روابط اور پشت پناہی کے شواہد سامنے آئے، برطرف کیے گئے تمام پولیس اہلکار تھانہ نیو ٹاؤن میں تعینات تھے، ایس ایچ او تھانہ نیو ٹاؤن انوارالحق کو بھی نوکری سے برخاست کر دیا گیا ہے۔

سی پی او راولپنڈی کا کہنا ہے کہ تمام تر کارروائی پولیس کے محکمہ احتساب کے میکینزم کے تحت کی گئی، راولپنڈی پولیس منشیات کے خلاف گرینڈ کریک ڈاؤن کر رہی ہے جسے ہر سطح پر پذیرائی ملی، 500 سے زائد منشیات فروشوں کو سزا ہوئی جو 10 سے 20 سال کی سزا کاٹ رہے ہیں۔

Source link