لندن: برطانیہ کی جانب سے اسرائیل کو ایف 35 لڑاکا طیاروں کے پرزوں کی فراہمی عدالت میں چیلنج کردی گئی۔
میڈیا رپورٹس کے مطابق انسانی حقوق کی فلسطینی تنظیم الحق نے امریکی ساختہ ایف 35 لڑاکا طیاروں کے پرزوں کی اسرائیل کو فراہمی کے خلاف ہائی کورٹ سے رجوع کیا ہے۔
برطانیہ نے گزشتہ برس اسرائیل کو اسلحہ فراہمی کے متعدد لائسنس معطل کیے تھے تاہم اس معاملے میں ایف 35 کے پرزوں کی فراہمی کو استثنیٰ دیا گیا تھا۔
وکیل درخواست گزار کا کہنا تھا کہ جرائم میں سہولت کاری ایک بڑے خطرے کو جنم دیتا ہے۔ برطانیہ نے مہلک طیاروں کے پرزوں کی فراہمی پر عالمی قانون کو درست طور پر نہیں سمجھا۔
وکیل کے مطابق غزہ میں رونما آفت کو الفاظ میں بیان کرنا مشکل ہے۔ غزہ میں اکتوبر 2023 سے اب تک 55 ہزار سے زائد فلسطینیوں کو شہیدکیا جاچکا ہے، صرف 18 ماہ میں اسرائیل نے ایک پورا معاشرہ تباہ کردیا۔
رپورٹ کے مطابق اسرائیل کو ایف 35 کے پرزوں کی فراہمی کا لائسنس برقرار رکھنےکا فیصلہ ڈیفنس سیکرٹری کے مشورے سے کیا گیا تھا۔
برطانوی حکومت کا مؤقف ہےکہ پرزوں کی فراہمی سے انٹرنیشنل پیس اینڈ سکیورٹی پر گہرا اثر پڑےگا۔
رپورٹ کے مطابق جنگ مخالف برطانوی اراکین پارلیمنٹ بھی مقدمےکی حمایت کر رہے ہیں۔ مقدمےکا فیصلہ آئندہ چند روز میں سنایا جائےگا۔
Leave a Reply